«Թուրքական հոսքի» շուրջ բանակցությունները ձախողվել են

«Թուրքական հոսք» գազատարի կառուցման շուրջ բանակցությունները անորոշ ժամանակով հետաձգվել են : Այդ մասին հայտնում է Reuters-ը` հղում անելով Թուրքիայի կառավարության իր աղբյուրներին: 

Թուրքական իշխանությունները պահանջում են ռուսական  գազի սակագնի 10.25 տոկոս զեղչ` տարեկան 28-30  մլրդ խորանարդ մետր գազի ներմուծման պարագայում: «Ռուսաստանը Թուրքիայից պահանջում է  համաձայնել միանգամից մի քանի սկզբունքային կետերի: Դա հնարավոր չէ: Նման պայմաններում 10.25 տոկոս զեղչի պահանջը մեր իրավունքն է»,- հայտնում է թուրքական աղբյուրը:

Եւս մի կետ, որին համաձայն չէ թուրքական կողմը, Մոսկվայի պահանջն է` կառուցել գազատարի  միանգամից 4 ճյուղ, մինչդեռ Անկարան համաձայնություն է  տվել միայն մեկ ճյուղի կառուցմանը:

Նշվում է, որ գազի սակագնի հարցով թուրքական իշխանությունները պատրաստ են հասնել մինչեւ միջազգային արբիտրաժ:

Աղբյուրը տեսակետ է հայտնել, որ Ռուսաստանում սպասում են թուրքական նոր կառավարության ձեւավորմանը, ինչն արդեն զգալի հետաձգում է նախագծի գործարկման ժամկետը: