Կոռուպցիայի դեմ պայքարելու նպատակով ԱՄՆ-ի միջազգային զարգացման գործակալության հետ համաձայնագիր կստորագրվի

Այսօր կառավարությունում տեղի է ունեցել կոռուպցիայի դեմ պայքարի հանձնաժողովի առաջին նիստը: Կոռուպցիայի դեմ պայքարի խորհուրդը գլխավորում է վարչապետ Հովիկ Աբրահամյանը, խորհրդի անդամներն են ֆինանսների նախարար Գագիկ Խաչատրյանը, կառավարության աշխատակազմի ղեկավար-նախարար Դավիթ Հարությունյանը, գլխավոր դատախազ Գևորգ Կոստանյանը, բարձրաստիճան պաշտոնատար անձանց էթիկայի հանձնաժողովի նախագահը, խորհրդարանական ընդդիմադիր խմբակցություններից մեկական ներկայացուցիչ, Հանրային խորհրդի նախագահը, Հայաստանի համայնքների միության մեկ ներկայացուցիչ և քաղաքացիական հասարակության երկու ներկայացուցիչ:

Կոռուպցիայի դեմ պայքարի խորհրդի առաջին նիստում կառավարության աշխատակազմի ղեկավար-նախարար Դավիթ Հարությունյանն ասաց, որ ՀՀ կառավարության և ԱՄՆ-ի միջազգային զարգացման գործակալության միջև կստորագրվի համաձայնագիր: Նա նշեց, որ ԱՄՆ-ի միջազգային զարգացման գործակալությունը պատրաստակամություն է հայտնել աջակցել Հայաստանին` կյանքի կոչելու կոռուպցիայի դեմ պայքարի ռազմավարությունը:

«Արդյունավետությունը կախված է այն կադրերից, որոնք ներգրավված են լինելու խորհրդում: Այս պահին մենք ունենք 4 ստրատեգիական ոլորտներ՝ կրթություն, առողջապահություն, ոստիկանություն և պետական եկամուտներ: Այս 4 ոլորտներում է, որ մեր աշխատանքներն իրականացվելու են, և գործունեության արդյունավետության համար շատ կարևոր է լավ կադրերի ընտրությունը»,- ասաց նախարարը:

Նա նշեց, որ կարևոր է հրավիրել այնպիսի փորձագետների, ովքեր ունեն փորձ կոռուպցիայի դեմ պայքարի գործում, և ովքեր կկարողանան ստեղծել փորձագետների դպրոց: ԱՄՆ-ի միջազգային զարգացման գործակալությունը համաձայնել է մեկ տարվա ֆինանսավորում տրամադրել փորձագետներին:

Դավիթ Հարությունյանը տեղեկացրեց, որ ԱՄՆ-ի միջազգային զարգացման գործակալության հետ համաձայնագրի կնքումը նախատեսում է 750 հազար ԱՄՆ դոլարի մասնակցություն ծրագրի իրականացմանը, իսկ ՀՀ կառավարության ֆինանսական մասնակցությունն այս ծրագրին կազմելու է 25 տոկոս: