Պատիժ կրելու ընթացքում դատապարտյալը խոշոր չափերով թմրամիջոցներ է իրացրել «Հրազդան» և «Կոշ» ՔԿՀ-ների դատապարտյալներին

ՀՀ քննչական կոմիտեի հատկապես կարևոր գործերի քննության գլխավոր վարչությունում ավարտվել է «Հրազդան» քրեակատարողական հիմնարկում պատիժը կրելու ընթացքում դատապարտյալի կողմից թմրամիջոցներ իրացնելու դեպքի առթիվ հարուցված քրեական գործի  նախաքննությունը:

Ինչպես տեղեկանում ենք Քննչական կոմիտեի պաշտոնական կայքից, նախաքննությամբ ձեռք բերված ապացույցներով պարզվել է, որ դատապարտյալը ՀՀ ԱՆ «Հրազդան» քրեակատարողական հիմնարկում պատիժ կրելու ընթացքում օժանդակողների միջոցով խոշոր չափերով թմրամիջոցներ է իրացրել ինչպես «Հրազդան», այնպես էլ՝ «Կոշ» քրեակատարողական հիմնարկում պատիժը կրող մի քանի դատապարտյալի։

Քննությամբ պարզվել են իրացման մեխանիզմը, իրացմանը և ձեռքբերմանն օժանդակողների ինքնությունը։

Ձեռք բերված ապացույցների համակցությամբ՝ «Հրազդան» քրեակատարողական հիմնարկի դատապարտյալին  մեղադրանք է առաջադրվել ՀՀ քրեական օրենսգրքի 266-րդ հոդվածի 2-րդ մասի 2-րդ կետի հատկանիշներով (2 դրվագ): Նրա մասով քրեական գործը՝ մեղադրական եզրակացությամբ, ուղարկվել է նախաքննության օրինականության նկատմամբ հսկողություն իրականացնող դատախազին։

Եվս 5 մեղադրյալի մասով քրեական գործը դատարան է ուղարկվել ավելի վաղ։ Իսկ թմրամիջոցների իրացմանը դատապարտյալին օժանդակողի մասով դրվագն անջատվել է առանձին վարույթ, և նախաքննությունը շարունակվում է։