ՀԷՑ-ի վաճառքի, աուդիտի եւ տուգանքների մասին

Այսօր գումարված` ՀԾԿՀ նիստում ՀԷՑ-ը տուգանվեց 60 միլիոն դրամով:

Լրագրողների հարցին, թե արդյո՞ք ՀԷՑ-ը վաճառվելու է, ՀԷՑ-ի մամուլի քարտուղար Նատալյա Սարջանյանը պատասխանեց, որ ՀԷՑ-ը պատրաստ է գնել ցանկացած ակտիվ և վաճառել ցանկացած ակտիվ` համապատասխան գին առաջարկելու դեպքում: Նա չկարողացավ պատասխանել, թե ո՞ր գնի դեպքում կարող է վաճառվել ՀԷՑ-ը:

«Այս պահի դրությամբ ՀԷՑ-ը վաճառելու կապակցությամբ որևէ բանակցություն չի ընթանում»,- ասաց ՀԷՑ-ի մամուլի քարտուղարը:

Հարցին, թե ճի՞շտ են տեղեկություններն այն մասին, որ «Տաշիր գրուպ»-ի սեփականատեր Սամվել Կարապետյանը պետք է գնի ՀԷՑ-ը, Նատալյա Սարջանյանը պատասխանեց. «Նման բան չկա»:

Հարցին, թե ինչպե՞ս եղավ, որ ՀԷՑ-ի նկատմամբ տարբեր տարիների վերաբերող դիմում-բողոքները ՀԾԿՀ-ն որոշեց հունիս ամսին քննել, և արդյո՞ք դա ճնշում է ընկերության վրա, նա պատասխանեց. «Դա երկարատև պրոցես է, բայց ես չեմ կարող պատասխանել, թե ինչու հենց հունիս ամսին հանձնաժողովը որոշեց վարույթ ընդունել, ես որևէ մեկնաբանություն չունեմ»:

Իսկ աուդիտի մասով ՀԷՑ-ի մամուլի խոսնակն ասաց, որ «Ինտեր ՌԱՕ»-ն և կառավարությունն աշխատում են տեխնիկական առաջադրանքների վրա, որից հետո կհայտարարվի մրցույթ, ինչի  արդյուքնում էլ կորոշվի այն ընկերությունը, որը կանցկացնի աուդիտը: Նատալյա Սարջանյանը նշեց, որ աուդիտի իրականացման ժամկետը 3-6 ամիս է: