Եթե Սերժ Սարգսյանը 5 հոգու բան ունի ասելու, թող հրապարակավ ասի. Նիկոլ Փաշինյան

Սերժ Սարգսյանը երեկ ասում էր՝ 5 հոգի թող գա, կընդունեմ, կխոսենք: Այն հարցերը, որոնք մարդիկ առաջ էին քաշում Բաղրամյան պողոտայում, հուզում են Հայաստանի Հանրապետության բոլոր քաղաքացիներին, ներառյալ` ոստիկանության աշխատակիցներին: Այս մասին այսօր լրագրողների հետ ճեպազրույցում ասաց ԱԺ պատգամավոր Նիկոլ Փաշինյանը:

«Եթե Սերժ Սարգսյանն այդ թեմայով 5 հոգու բան ունի ասելու` ոչ մի արգելեք չկա, թող ինքը հանրային հեռուստաընկերության եթերով ասուլիս հրավիրի, հայտարարություն անի, ուղերձով դիմի, հարցազրույց տա, թող իր ասելիքն ասի: Ի՞նչ է նշանակում` 5 հոգու հավաքել, ասել` գնանք, սենյակում խոսենք: Եթե Սերժ Սարգսյանը ՀԷՑ-ի ապօրինությունների, էլեկտրաէներգիայի սակագնի հետ կապված ասելիք ունի՝ թող ինքն ասի, ոչ մեկ խոչընդոտ չի հանդիսանում»,- ասաց պատգամավորը:

Փաշինյանի խոսքով՝ կան շեշտադրումներ, որ ՀԷՑ-ի թալանին Հայաստանի իշխանություններն ուղղակի կամ անուղղակի առնչվել են և գիշերվա գործողությունով իշխանությունը, Սերժ Սարգսյանն ու իրավապահ համակարգը խոստովանեցին, որ` այո’, իրենք կիսում են այդ պատասխանատվությունը: