Թուրքիայի ԱԳՆ-ն անդրադարձել է Բելգիայում թուրք պատգամավորին կուսակցությունից հեռացնելու դեպքին

Թուրքիայի ԱԳ նախարար Մևլութ Չավուշօղլուն անդրադարձել է Բելգիայում «Հումանիստական կենտրոն» կուսակցությունից Հայոց ցեղասպանությունը չճանաչելու համար ազգությամբ թուրք պատգամավոր Մահինուր Օզդեմիրին հեռացնելու դեպքին:

Ըստ Medyahaber-ի՝ Թուրքիայի ԱԳՆ մամուլի խոսնակ Թանժու Բիլգիչը գրավոր հայտարարությամբ է հանդես եկել` հայտնելով իր անհանգստությունը կատարված կապակցությամբ:

Թուրք պատգամավորի՝ կուսակցությունից հեռացվելու վերաբերյալ հարցին Բիլգիչն ասել է. «Արմատական ժողովրդավարության ավանդույթներ ունեցող Բելգիայում քաղաքական կուսակցության նման որոշումը հակասում է ժողովրդավարական ազատությանը: Մենք այս որոշումը զարմանքով ենք ընկալում»:

Բիլգիչը հայտնել է, որ «տարաձայնությունների սերմեր ցանող նման դիրքորոշումները, որոնք կոչված են ատելություն սերմանել հասարակությունում», կարող են խնդիրների խորացման պատճառ հանդիսանալ ԵՄ-ին ինտեգրվելու ընթացքում։