Ճոյտի որդու և եղբոր վիճակը շարունակում է մնալ ծայրահեղ ծանր

Երևանի այրվածքաբանական կենտրոնում գտնվող` ԱԺ նախկին պատգամավոր Հակոբ Հակոբյանի որդու՝ 29-ամյա Արմեն Հակոբյանի և եղբոր՝ 50-ամյա Արմեն Հակոբյանի վիճակը շարունակում է մնալ ծայրահեղ ծանր: Նրանք, ինչպես նաև գազալցակայանի պայթյունից տուժած աշխատակից Արթուր Գասպարյանը շարունակում են մնալ վերակենդանացման բաժանմունքում:

Կենտրոնի տնօրեն Նորայր Դավիդյանը yerkir.am-ի հետ զրույցում հայտնեց, որ կրտսեր Արմենի և Արթուրի կյանքին վտանգ չի սպառնում, ինչը չի կարելի ասել Հակոբ Հակոբյանի եղբոր մասին: Դավիդյանի խոսքով՝ հիվանդների մոտ շոկից դուրս գալու նշաններ են նկատվում: Նա հայտնեց նաև, որ մոտ օրերս Արթուր Գասպարյանին կտեղափոխեն պալատ:

Հիշեցնենք, որ երեկ առավոտյան պայթյուն էր տեղի ունեցել Զվարթնոց թաղամասում գործող գազալցակայանում, որը երեք տարի փորձաքննություն չի անցել: Մայիսի 15-ին գազալցակայանը տուգանվել էր, և դրա շահագործումն արգելվել էր: Նախապատրաստված նյութերով` Արմավիրի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 279-րդ հոդվածի 2-րդ մասի 2-րդ կետի հատկանիշներով։ Կատարվում է նախաքննություն: