Ինչպե՞ս է ընտրողը քվեաթերթիկում տարբերելու երկու` նույն անուն-ազգանունով թեկածուներին

Արդեն տեղեկացրել ենք, որ հունիսի 7-ին Աբովյանում քաղաքապետի ընտրություններում առաջադրված թեկնածուներից երկուսի անուն-ազգանունը, անգամ` հայրանունը համընկնում են՝ Հարությունյան Արթուր Գեղամի: Մեկը հանրությանը հայտնի Պալաչն է:

Yerkir.am-ը ԿԸՀ մամուլի պատասխանատու Հերմինե Հարությունյանից փորձեց ճշտել, թե թեկնածուների անվան, ազգանվան և հայրանվան համընկնման դեպքում, օրենքի շրջանակներում, ի՞նչ կարգավորումներ են նախատեսվում, ինչպե՞ս պետք է ընտրողը քվեաթերթիկում տարբերի մի Հարությունյան Արթուրին` մյուսից:

Մամուլի պատասխանատուն տեղեկացրեց, որ, համաձայն օրենսդրության, թեկնածուների անունների դիմաց նշվում է նաև նրանց ծննդյան թիվը:

Մեր դիտարկմանը, թե դա, միեւնույն է, մոլորության մեջ է գցում ընտրողներին, ի վերջո, նրանք պարտավոր չեն իմանալ, թե կոնկրետ, որ թվականին է ծնվել իրենց ցանկալի թեկնածուն, Հարությունյանը պատասխանեց. «Այդ դեպքում արդեն պետք է թեկնածուներն իրենց աշխատանքը տանեն ընտրողների հետ»:

Ուշագրավ է, որ թեկնածուներից Պալաչը ծնվել է 1975 թվականին, մյուս Արթուր Հարությունյանը՝ 1976 թվականին: