Բերդավանում աղբյուրի մոտ մահացած 23-ամյա աղջիկն էպիլեպսիայով էր տառապում

Նոյեմբերի 13-ին ՀՀ ոստիկանության Տավուշի մարզային բաժին ահազանգ է ստացվել, որ Բերդավան գյուղի հանդամասում աղջկա դիակ է հայտնաբերվել: Yerkir.am-ի տեղեկություններով՝ մահացածը 23-ամյա Ա. Մուրադյանն է, նա տառապում էր էպիլեպսիա հիվանդությամբ:

Մեզ հետ զրույցում Բերդավանի գյուղապետ Արարատ Գաբրիելյանը պատմեց, որ դեպքը տեղի է ունեցել աղջկա տան հարակից աղբյուրի մոտ: «Դեռևս հայտնի չէ, ինչից է մահացել, բայց դիակի վրա բռնության հետքեր չեն եղել»,- ասաց նա և հավելեց, որ աղջկա հիվանդությունը ընտանեկան է:

Գյուղապետի խոսքով՝ մահացած աղջիկն ամուսնացած չէր, ուներ երկու քույր ու եղբայր: «Նրա մոտ հաճախակի նոպաներ էին կրկնվում: Այս ընտանիքին «Կիսաբաց լուսամուտներ» հաղորդաշարով էլ են ցուցադրել, նկարահանումների ժամանակ անգամ աղջիկը միջանցքում նոպաներ է ունեցել»,- պատմեց գյուղապետը:

Նրա խոսքով՝ ընտանիքը գյուղացիներից մեկուսացած էր ապրում: «Անասնապահությամբ էին զբաղվում, երեխաները դպրոցական հասակում հազվադեպ էին դպրոց հաճախում»,- ասաց Գաբրիելյանը:

Նշենք, որ դեպքի հանգամանքները պարզելու համար քննություն է ընթանում: Երիտասարդ աղջկա հուղարկավորությունը կկայանա այսօր: