Քաղաքաշինության նախարարության պաշտոնյայի գործը՝ դատարանում

Արարատի և Վայոց Ձորի մարզի ընդհանուր իրավասության դատարանի դատավոր Ռուբիկ Մխիթարյանին է մակագրվել ՀՀ քաղաքաշինության նախարարության քաղաքաշինական պետական տեսչության Արարատի տարածքային բաժնի պետ Հրաչիկ Հովհաննիսյանի՝ կաշառք ստանալու վերաբերյալ գործը:

Նախաքննությամբ, մասնավորապես պարզվել է, որ Հ.Հովհաննիսյանը, օգտագործելով իր պաշտոնեական դիրքը, քաղաքացի Գ.Սահակյանի օգտին իր լիազորության շրջանակներում որոշակի գործողություններ կատարելու համար որպես միջնորդ հանդիսացող Ժ.Շահբազյանից մարտի 11-ին պահանջել է զգալի չափերով գումար։ Մեղադրական եզրակացության համաձայն՝ այդ գումարը կազնել է  70000 ՀՀ դրամ: 

Երկու օր հետո՝ մարտի 13-ին, պայմանավորվածության համաձայն, Հ.Հովհաննիսյանն իր աշխատասենյակում ստացել է պահանջված գումարը, որից անմիջապես հետո տեղում բռնվել է ՀՀ կառավարությանն առընթեր ոստիկանության կազմակերպված հանցավորության դեմ պայքարի գլխավոր վարչության աշխատակիցների կողմից:

Ձեռք բերված ապացույցների հիման վրա Հ.Հովհաննիսյանին մեղադրանք է առաջադրվել ՀՀ քրեական օրենսգրքի 311-րդ հոդվածի 1-ին մասի հատկանիշներով՝ պաշտոնատար անձի կողմից կաշառք ստանալու համար:

Հովհաննիսյանի նկատմամբ, որպես խափանման միջոց է ընտրվել կալանավորումը: