Չի բացառվում, որ Գերմանիան Օբամայի ազդեցության տակ է արդեն. ՀՀԿ-ական

ԱԺ ՀՀԿ-ական պատգամավոր Սուքիաս Ավետիսյանը Yerkir.am-ի հետ զրույցում նշեց, որ որևէ մեկը իրավունք չունի ասելու` մենք Թուրքիայից պահանջներ չունենք:

«Մեր երկրի նախագահը շատ հստակ նշեց` ոչ միայն հողային ու գույքային պահանջի մասին է խոսքը: Պահանջի էությունն այն է, որ Թուրքան և համաշխարհային հանրությունը ճանաչեն 1915 թվականի ցեղասպանությունը: Որպես հայ և բազմամիլիոն հայերի սերունդներ` ամեն մեկն ունի իր պահանջը: Պետք է տարբերենք պետության պաշտոնական դիրքորոշումը, որը հնչում է նախագահի կողմից, և ընդհանուր հայերի կամ առանձին հայի պահանջատիրությունը, որի նախնիների ձեռքից վերցրել են հողերը: Դա արդեն այլ խնդիր է, և որևէ մեկը չի կարող ասել, որ մենք չունենք պահանջներ»,- ասաց Ավետիսյանը:

Պատգամավորի կարծիքով`Ցեղասպանության 100-րդ տարելիցի միջոցառումներն անցան բարձր մակարդակով, տեղին և համեստ ձևով կազմակերպված էին:

Yerkir.am-ի հարցին` ինչո՞վ է պայմանավորված Գերմանիայի Բունդեսթագում Հայոց ցեղասպանության դատապարտման բանաձևի քվեարկության հետաձգումը, և արդյոք հնարավո՞ր է, որ Օբամայի`«ցեղասպանություն» բառը չարտասանելն ունեցավ իր ազդեցությունն այդ հետաձգման վրա, Ավետիսյանը պատասխանեց. «Այսօր տարբեր պետություններ տարբեր ազդեցությունների տակ են, այնպես որ` պետք է օբյեկտիվորեն ամեն ինչ ընդունենք: Չի բացառվում, որ Օբամայի ազդեցության տակ են արդեն: Ճիշտ է` Գերմանիայի նախագահն ասաց «ցեղասպանություն» բառը, և Բունդեսթագը մեկ րոպե լռությամբ հարգեց մեր անմեղ զոհերի հիշատակը, բայց հնարավոր է` քվեարկության ժամանակ ազդեցությունների տակ լինեն»: