Գոռ Դարմանյանին Ստեփանակերտի հոսպիտալից Երևան են տեղափոխել

Հակառակորդի հատուկ նշանակության ջոկատի ուժեղացված խմբի՝ մարտի 19-ին ձեռնարկած հարձակման ժամանակ վիրավորված Գոռ Դարմանյանին տեղափոխել են Երևան: Վիրավորված զինծառայողն այժմ գտնվում է Հայաստանի կենտրոնական կլինիկական զինվորական հոսպիտալում։ Այս մասին այսօր Yerkir.am-ին տեղեկացրեց զինվորի հայրենի Թալինի քաղաքապետ Սարգիս Արամյանը:

«Գոռի առողջական վիճակը կայուն է այժմ, տեղափոխել են Երևան: Ճիշտն ասած` տեղյակ չեմ՝ երբ դուրս կգրեն նրան, սակայն գիտեմ, որ հիմա համեմատաբար ավելի լավ է զգում»,- ասաց քաղաքապետը: Նա տեղեկացրեց նաև, որ Գոռի մոտ այժմ նրա հարազատներն են:

Հիշեցնենք, որ Գոռ Դարմանյանի մոտ առկա է ոտքի ամպուտացիա:

Ավելի վաղ ԼՂՀ ՊԲ մամուլի ծառայությունը հայտնել էր, որ մարտի 19-ին՝ ժամը 08:30-ի սահմանում, հակառակորդի հատուկ նշանակության ջոկատի ուժեղացված խումբը հարձակում է ձեռնարկել հյուսիսային (Գյուլիստանի) ուղղությամբ տեղակայված դիրքերի վրա: Շուրջ երկու ժամ տևած մարտական գործողության արդյունքում դիրքապահ անձնակազմը և օգնության հասած ուժերը ստիպել էին հակառակորդին փախուստի դիմել, այնուհետև, հետապնդելով նրանց, ամբողջությամբ ոչնչացրել էին խմբին նրանց դիրքերի մատույցներում: Հակառակորդին դիմագրավելու ժամանակ արիաբար զոհվել էին ՊԲ զինծառայողներ Հակոբ Գագիկի Խաչատրյանը (1996թ.), Էդուարդ Գագիկի Հայրապետյանը (1995թ.) և Արշակ Կարենի Հարությունյանը (1995թ.), Պաշտպանության բանակի ևս 4 զինծառայողներ վիրավորվել էր: Վիրավորված զինծառայողներից Սամվել Հակոբյանը մարտի 26-ին հոսպիտալում մահացել էր: