Ermeni. Իեյլի համալսարանում Ցեղասպանության զոհերի հիշատակին նվիրված ներկայացում կբեմադրվի

Մարտի 26-28-ը Իեյլի համալսարանի Դրամատիկական ընկերակցությունը համալսարանի Ռեպերտուարային թատրոնում ներկայացնելու է «Ermeni»  ներկայացումը. Տեղեկացնում է Armeniangenocide100-ը` վկայակոչելով Asparez-ը:

Ներկայացումը  Հայոց ցեղասպանությունից հետո Ամերիկայում բնակություն հաստատած հայ ընտանիքի մասին է: Հեղինակը Էրիկ Սիրակյանն է, ռեժիսորը՝ Նոամ Շապիրոն:

«Ermeni»-ն պատմում է ամերիկահայ ուսանողուհի Անիի պատմությունը: Անին 1970 թվականի հոկտեմբերին ընտանիքին է ներկայացնում իր թուրք ընկերոջը՝ Թաներին: Պատմության շուրջ ծավալված բանավեճը վերածվում է ընտանեկան ճգնաժամի, երբ Անիի կաթվածահար եղած տատիկին հոսպիտալացնում են: Թաներն այցելում է հոսպիտալացված ծեր կնոջը, և նրանց միջև ընկերություն է սկսվում.  նրանք «ճանապարհորդում են» դեպի անցյալը և բացահայտում վաղուց թաղված ընտանեկան գաղտնիքը:

«Գեղեցիկ կառուցվածքից, բնութագրերից և լեզվից բացի, «Ermeni» ներկայացումը հատուկ կոչ է՝ հիշելու հայ ժողովրդի հետ կատարվածը, սա կոչ է մեր խղճին: Ներկայացումը, պատմելով անգամ այսօր մեր կյանքում արտացոլվող անցյալի եղելությունները, փոխկապակցում է անցյալն ու ներկան»,- ասում է Շապիրոն: 

Ներկայացմանը հետևելու է լրացուցիչ քննարկում, որը տեղի կունենա մարտի 28-ին: Քննարկման մասնակիցների թվում են լինելու Միչիգանի համալսարանի հասարակագիտության պրոֆեսոր Ֆաթմա Գոչեքը և Իեյլի համալսարանի պատմության պրոֆեսոր Ջեյ Ուինթերը: Քննարկումը կազմակերպվել է Իեյլի համալսարանի Ցեղասպանագիտության ծրագրի աջակցությամբ: