Էկոնոմիկայի նախարարը հոռետեսորեն չի տրամադրված տնտեսության անկումների հարցում

Կառավարության նիստից հետո լրագրողների հետ զրույցում ՀՀ էկոնոմիկայի նախարար Կարեն Ճշմարիտյանը, պատասխանելով այն հարցին, թե արդյո՞ք կառավարությունը մտադիր է վերանայել բյուջեով նախատեսված 4,1 տոկոս աճը, պատասխանեց. «Դեռևս ոչ: Իհարկե, դժվարություններ կան` արտաքին ազդեցությունների հետ կապված, և դա սպասելի էր, որովհետև փոփոխություններ եղան արժույթի շուկաներում, նաև բնական եմ համարում, որ արտաքին ազդեցության ներքո եղավ արտահանման կրճատումներ, առևտրատնտեսական հարաբերությունների որոշակի դանդաղում: Բայց շուկաներում ընթանում է գների ճշգրտման պրոցես: Գործարարները ոչ թե ներդրումներ չեն անում, այլ պարզապես սպասում են` մինչև վիճակը կկայունանա Ռուսաստանում ու ԵՄ-ում»:

Նա նաև հավելեց, որ այս ամենի հետ մեկտեղ կանխատեսումները այդքան էլ հոռետեսական չեն` տարվա կտրվածքով: «Մենք այսօր այդքան խորը հոռետեսական հիմքեր չունենք, պիտի իրավիճակին նայենք կայունության մակարդակի տեսանկյունից: Եթե համակարգն այնպես կարգավորվի, որ գործարարները կարողանան ռուբլիով գործարքներ իրականացնել, ապա կկարգավորվի ամեն ինչ: Ժամանակ պահանջող գործընթաց է, կարծում եմ` մեկ-երկու ամսվա մեջ ամեն ինչ կկարգավորվի»,- ասաց Կարեն Ճշմարիտյանը: