Դիվերսիայի հետևանքով զոհված փոխգնդապետին ցանկանում էին տեղափոխել այլ զորամաս` ղեկավար պաշտոնի

Փետրվարի 28-ին Արցախում Ադրբեջանի իրականացրած հերթական դիվերսիայի հետևանքով զոհված` 36-ամյա փոխգնդապետ Արտակ Աղեկյանի և 20-ամյա Հայկ Բարոյանի հոգեհանգիստը տեղի կունենա այսօր` ժամը 17:00-ին,  Տաշիր քաղաքի Սուրբ Սարգիս եկեղեցում:

Նշենք, որ Պաշտպանության բանակի զինծառայողների հոգեհանգստի արարողությանը կմասնակցեն Հայաստանի Հանրապետության պաշտպանության նախարար Սեյրան Օհանյանը և մի շարք այլ բարձրաստիճան զինվորականներ:

Փոխգնդապետ Արտակ Աղեկյանին ճանաչողները yerkir.am-ի հետ զրույցում հայտեցին, որ նա աչքի էր ընկնում մեծ փորձառությամբ, ինչը բարձր է գնահատել ՊԲ ղեկավարությունը: Մեր տեղեկություններով` հաշվի առնելով ռազմական ոլորտում նրա ունեցած փորձը` Աղեկյանին ցանկացել են տեղափոխել սահմանագծում գտնվող մեկ այլ զորամաս և նշանակել ղեկավար ու պատասխանատու պաշտոնի:

Հիշեցնենք, որ փետրվարի 28-ին՝ ժամը 14:25-ի սահմաններում, ՊԲ հյուսիսարևելյան ուղղությամբ տեղակայված զորամասերից մեկի պահպանության տեղամասի մարտական հենակետերի ուղղությամբ հակառակորդը ձեռնարկել էր դիվերսիոն հետախուզական ներթափանցման փորձ: ՊԲ առաջապահ ստորաբաժանումները ժամանակին հավաստանշել էին հակառակորդի հատուկ ջոկատայինների առաջխաղացումը, և հակառակորդը, կորուստներ կրելով, հետ էր շպրտվել ելման դիրքերը: Ցավոք, ծավալված մարտերի ժամանակ զոհվել էին զինծառայողներ` 1979թ. ծնված Արտակ Սեդրակի Աղեկյանը և 1995թ. ծնված Հայկ Գրիգորի Բարոյանը: