Քննիչներն ասել են, թե Պերմյակովի մոտից հայտնաբերված երեք հեռախոսներից երկուսն ումն են

«Ինձ համար ամենակարևորն էս պահին այն է, որ քննչականում մեզ ավելի շատ տեղեկություն տան, որովհետև ես ամեն օր քնելուց առաջ սպասում եմ, որ կզանգեն ինձ, բան կասեն: Ես ուղղակի շատ եմ խնդրում, եթե ինչ-որ բան կա, կանչեք, ասեք»,- լրագրողների հետ հանդիպման ժամանակ ասաց Գյումրիում սպանված Ավետիսյանների դուստրը` Լուսինե Ավետիսյանը:

«Ես վախենալու ոչ մի բան չունեմ, ուղղակի ուզում եմ բուն պատճառն իմանալ, ինձ պետք է իմանալ` ինչո՞ւ հենց իմ տունը, իմ հարազատները»,- հավելեց նա:

Ավետիսյանների իրավահաջորդների ներկայացուցիչ Երեմ Սարգսյանն էլ հայտարարեց, որ իրավահաջորդները գործի վերաբերյալ տեղեկատվության պակաս ունեն: «Ճիշտ է, մենք օրենքով սահմանված կարգով ստանում ենք նյութերը, պարզապես տուժողներն ակնկալում են, որ հնարավորինս արագ նախաքննությունն ավարտվի»,- ասաց նա:

Անդրադառնալով գործում այլ փաստաբաններ ներգրավելուն` Սարգսյանը հայտնեց, որ այդ հարցն իրավահաջորդների հետ հենց սկզբից է քննարկվել: «Եթե լինեն այլ փաստաբաններ, ովքեր ցանկություն կհայտնեն անվճար հիմունքներով ծառայություն մատուցել, տուժողների հետ համաձայնեցնելուց հետո թող ներգրավվեն»,- ասաց նա:

Լուսինե Ավետիսյանն էլ, խոսելով Պերմյակովի և իր ընտանիքի անդամների հետ հնարավոր կապի մասին, նշեց, որ Պերմյակովն ընդամենը մեկ ամսվա ծառայող էր և չէր կարող կապ ունենալ: Նա նաև հայտնեց, որ իրենց տանից արժեքավոր իրեր չեն տարել, մոր և քրոջ վրա ոսկեղեն է եղել, որը մնացել է:

Լուսինեի ամուսինը` սպանված Սերյոժա Ավետիսյանի իրավահաջորդ Եգոր Ադամյանը, հայտնեց, որ ինքը քննիչներից լսել է, որ Պերմյակովի մոտից հայտնաբերված հեռախոսներից մեկը պատկանել է Հասմիկ Ավետիսյանին, մեկկն էլ` Արմեն Ավետիսյանին, իսկ մյուս հեռախոսի պատկանելության մասին որեւէ բան չգիտի:

Yerkir.am-ի հարցին` արդյոք հարազատներին ճանաչման համար ներկայացվե՞լ են հեռախոսները, Եգոր Ադամյանն ու Երեմ Սարգսյանը պատասխանեցին` ոչ: