Պուտինն ԱՄՆ-ին անդրկուլիսային գործարքների մեջ է մեղադրում

ԱՄՆ-ը մշտապես  ազդում է Մոսկվայի եւ նրա գործընկերների հարաբերությունների վրա. Դաշնային խորհրդին ուղղված իր ամենամյա ուղերձում այսօր ասել է ՌԴ նախագահ Վլադիմիր Պուտինը:

Ըստ նրա` ամերիկացի «ընկերները» ուղղակի եւ անուղղակի` կուլիսներում, ճնշում են գործադրում Ռուսաստանի հարեւանների վրա: «Երբեմն չգիտես` ում հետ խոսել` որոշ պետությունների կառավարությունների՞, թե՞ ուղղակիորեն նրանց ամերիկացի հովանավորների հետ»,- հայտարարել է ՌԴ նախագահը:

Ընդ որում, ըստ Պուտինի, Ռուսաստանը ոչ մի պարագայում չի պատրաստվում խզել հարաբերությունները Եվրոպայի եւ ԱՄՆ-ի հետ, սակայն դա չի նշանակում, որ Մոսկվան մտադիր է սահմանափակվել Արեւմուտքի հետ հարաբերություններով. Ռուսաստանը կհամագործակցի Հարավային Ամերիկայի հետ, կպաշտպանի իր դիրքերը Աֆրիկայում եւ Մերձավոր Արեւելքում, կընդլայնի իր ներկայությունը Ասիական-խաղաղօվկիանոսյան տարածաշրջանում:

Պուտինի խոսքերով` Ռուսաստանն իր նպատակներին կհասնի` առաջ տանելով գիտական, կրթական, մշակութային կապերը, աշխարհին իր մասին ճշմարտությունը պատմելով:

ՌԴ նախագահի ուղերձը Դաշնային խորհրդին հիմնարար փաստաթուղթ է, որում ձեւակերպվում է պետության ղեկավարի դիրքորոշումը ռուսական քաղաքականության հիմնական դրույթների վերաբերյալ: