Հեֆերնը հանդիպման փակագծերը չբացեց

Այսօր ԱԺ արտաքին հարցերի մշտական հանձնաժողովում փակ քննարկում էր նախատեսված ԱՄՆ դեսպան Ջոն Հեֆերնի հետ: Հատկանշական է, որ հանդիպումից անմիջապես առաջ հանձնաժողովում քննարկվելու էր ԵՏՄ-ին Հայաստանի անդամակցության պայմանագիրը:

Փակ քննարկումից հետո լրագրողները բազմաթիվ հարցեր ունեին ԱՄՆ դեսպան Ջոն Հեֆերնին թե' ներքաղաքական, թե' արտաքին քաղաքական կարևորագույն հարցերի վերաբերյալ: Սակայն դեսպանը խուսափեց տասնյակ լրագրողների հարցերից` ասելով, թե առաջիկայում ինչ-որ միջոցառում է լինելու, և այնտեղ ինքը կարող է պատասխանել հարցերին: Նա միայն խոսեց փակ քննարկման մասին` ըստ էության, ոչ մի էական տեղեկություն չհաղորդելով:

«Սովորական հանդիպում էր արտաքին հարցերի հանձնաժողովում: Անդրադարձ կատարեցինք հարցերի շատ լայն շրջանակի: Հանձնաժողովը մեր կարևոր գործընկերներից է, մենք պարբերաբար հանդիպումներ ենք ունենում, և օրենսդրական դաշտում իրականացվող աշխատանքները նույնպես մեծ կարևորություն ունեն»,- ասաց Հեֆերնը ու հեռացավ` չպատասխանելով մնացած հարցերին: