Եկել է խաղաղության ժամանակը. Ուորլիքը խոսել է Սարգսյան-Ալիև հանդիպման մասին

ԵԱՀԿ Մինսկի խմբի ամերիկացի համանախագահ Ջեյմս Ուորլիքը մեկնաբանել է հոկտեմբերի 27-ին Փարիզում տեղի ունեցած` Հայաստանի եւ Ադրբեջանի նախագահների հանդիպումը. հայտնում է haqqin.az-ը:

Report -ի հետ զրույցում նա ասել է, որ «ամեն անգամ, երբ նախագահները հանդիպելու հնարավորություն են ունենում, նրանք կարողանում են պարզաբանել իրենց դիրքորոշումներն ու նվազեցնել տարաձայնություններն առանցքային հարցերի շուրջ, ինչպես դա եղավ Փարիզում»:

«Ես ոգևորված էի այն բանով, որ երկու նախագահներն էլ ցանկանում են հակամարտությունը դադարեցնել բանակցային ճանապարհով: Նրանք միմյանց հստակ հասկացնել տվեցին, որ եկել է խաղաղության ժամանակը, և որ հայերի ու ադրբեջանցիների միջև առկա թշնամանքը պետք է իր տեղը զիջի համագործակցության նոր ժամանակաշրջանին»,- նշել է ամերիկացի համանախագահը:

Նախագահների հանդիպումները, ըստ նրա, նպաստում են նաև շփման գծում եւ Հայաստանի ու Ադրբեջանի սահմանին իրավիճակի կայունացմանը:

«Ֆրանսիայի նախագահ Ֆրանսուա Օլանդը հայտարարել է, որ եկել է  խաղաղության համապարփակ համաձայնագրի նախապատրաստման ժամանակը: Ես հուսով եմ, որ կողմերը լրջորեն կդիտարկեն այդ քայլը»,- ընդգծել է Ուորլիքը: