Ֆինանսների փոխնախարարը «գաղտնազերծեց», թե ինչու է հիմնավերանորոգվում շենքի նկուղը

ՀՀ ֆինանսների փոխնախարար Վախթանգ Միրումյանը yerkir.am-ի հետ զրույցում, անդրադառնալով ֆինանսների նախարարության շենքում կատարվող շինարարությանը, ասաց, թե տեղյակ չէ` որքան գումար է հատկացվել շինարարությանը եւ որտեղից այդ գումարը:

Հիշեցնենք, որ Գագիկ Խաչատրյանի՝ նախարար նշանակվելուց հետո նախարարությունում լայնածավալ շինարարա-վերանորոգման աշխատանքներ են իրականացվում: Թե որքան գումար  է նախատեսված այդ շինարարության համար եւ որտեղից այդ գումարը ֆինանսների նախարարությունից yerkir.am-ի հարցմանը չեն պատասխանել՝ խախտելով տեղակատվության ազատության մասին օրենքը:

Միրումյանը նշեց միայն, որ ինքը կունենա նոր աշխատասենյակ: «Սովորական աշխատասենյակ` սովորական աշխատանքային պայմաններով, արտառոց որևէ բան չկա»,- վստահեցրեց նա:

Մեր դիտարկմանը, որ անգամ նախարարության նկուղային հարկն է հիմնավերանորոգվում, ինչո՞ւ, Միրումյանը պատասխանեց, որ դա նախկինում ճաշարան է եղել, որը երկար տարիներ ծառայել է որպես պահեստ, եւ նախարարության աշխատակիցները հնարավորություն չեն ունեցել ճաշելու տեղ ունենալ:

Ստացվում է՝ ֆինանսների նախարարության աշխատակիցները ոչ միայն «եվրոսենյակներ» կունենան, այլ նաեւ «եվրոճաշարան», ոչինչ, որ նկուղում է…