Ո՞վ է Մեղրիի քաղաքապետի դեմ նյութեր տրամադրել

«Փաստինֆո»-ի տեղեկություններով` Սյունիքի մարզային քննչական վարչությունում նյութեր են նախապատրաստվում Մեղրիի քաղաքապետ Արշավիր Հովհաննիսյանի կողմից պաշտոնեական պարտականությունները պատշաճ չկատարելու համար: Ստացված նյութերի համաձայն` Մեղրիում իրականացվող ինքնակամ շինարարությունը կասեցնելու պարտականությունը քաղաքապետը չի կատարում, ինչի կապակցությամբ քննություն է սկսվել:

Yerkir.am-ը փորձեց զրուցել քաղաքապետի հետ, սակայն տեղեկացանք, որ նա գործուղման մեջ է և վաղը նոր կվերադառնա Մեղրի:

Մեղրիի քաղաքապետարանում էլ  հանկարծակիի եկան` նշելով, որ չեն հասկանում` ինչ է կատարվում, ով է նման նյութեր տրամադրել քննչական մարմնին:

«Կասեցնում ա, բողոքում են, չի կասեցնում, գործ են բացում»,- զարմանք հայտնեց մեզ հետ զրուցող` քաղաքապետարանի աշխատակիցը: 

Նշենք, որ նախքան քաղաքապետ դառնալը Արշավիր Հովհաննիսյանն անհատ ձեռներեց է եղել և որևէ կուսակցության չի հարել, սակայն 2012-ի սեպտեմբերի 9-ի ընտրություններում Մեղրու նախկին քաղաքապետ, ՀՀԿ-ական Սերգեյ Հայրապետյանի նկատմամբ հաղթանակ տանելուց հետո, Սյունիքի մարզպետ Սուրիկ Խաչատրյանի հորդորով, անդամագրվել է ՀՀԿ-ին: