Կցուցադրվեն Սահակ Սահակյանի չեխական շարքի մանրաքանդակները

Երեկ Հովհաննես Շարամբեյանի անվան ժողովրդական ստեղծագործության կենտրոնում բացվել է ժողովրդական վարպետ Սահակ Սահակյանի մանրաքանդակների ցուցահանդեսը: Ներկայացված են հեղինակի չեխական շարքի մանրաքանդակները /Յարոսլավ Հաշեկի «Շվեյկ» աշխատանքը լայն ճանաչում է բերել վարպետին Չեխոսլովակիայում, որի համար էլ նրան շնորհվել է Սկալիցա քաղաքի պատվավոր քաղաքացու կոչում/:

Ժողովրդական վարպետ Սահակ Սահակյանի ստեղծագործական որոնումների համար ներշնչանքի աղբյուր են հայ ավանդական ճարտարապետության, խեցեգործության, կարպետագործության նմուշները, խաչքարերի զարդանախշերը: Նրա հմուտ ձեռքի տակ սովորական կավը, փայտը, մետաղը, կաշին ու տարատեսակ ներկերը դառնում են արարող հումք, ինքնաարտահայտման յուրատիպ միջոց և արվեստի գործ: Սահակ Սահակյանի ստեղծագործություններում իրենց նորովի կերպավորումն են գտնում համաշխարհային գրականության, դիցաբանական պատումների հանրաճանաչ հերոսները:

Բազմաշնորհ վարպետը մասնակցել է մի շարք հանրապետական և միջազգային մրցույթների՝ արժանանալով բազմաթիվ մեդալների ու պատվոգրերի, իսկ նրա աշխատանքների վերաբերյալ ռուս անվանի արվեստաբան Ա. Կամենսկին ասել է. «Սահակ Սահակյանի ստեղծագործությունները դիտելիս պարզորեն զգում ենք, թե որքան շատ բան կարող է տալ և որքան անվերջանալի է ազգային ավանդույթի հավերժական տարերքը»:

Ցուցահանդեսը կգործի մինչև հոկտեմբերի 12-ը: