Կամերային նվագախմբի` Ֆրանսիայի համերգին ներկա կգտնվի նաև Ազնավուրը

Հայաստանի պետական կամերային նվագախումբը՝ գեղարվեստական ղեկավար և գլխավոր դիրիժոր Վահան Մարտիրոսյանի գլխավորությամբ /տնօրեն Նորայր Նազարյան/, սեպտեմբերի 3-12-ը հյուրախաղերով հանդես կգա Ֆրանսիայի և Շվեյցարիայի մի շարք քաղաքներում: Նվագախումբը հանդես կգա 8 համերգով:

Հյուրախաղերի առաջին համերգը սեպտեմբերի 3-ին է` Գարժիլեսում (Ֆրանսիա): Հավատարիմ մնալով իր ավանդույթներին` նվագախումբը համերգային ծրագրերում այս տարի էլ է ընդգրկել հայ կոմպոզիտորների ստեղծագործությունները:

Սեպտեմբերի 7-ին Ժնևի «Վիկտորիա Հոլ»-ում կայանալիք` Հայաստանի պետական կամերային նվագախմբի համերգին, որն անցկացվելու է Շվեյցարիայում Հայաստանի Հանրապետության դեսպանության հովանու ներքո, ներկա է գտնվելու մեծ շանսոնյե Շառլ Ազնավուրը: