«Անահիտ» մուլտֆիլմի պրեմիերան` շուտով

Դեռեւս 2010թ., ՀՀ մշակույթի նախարարության պատվերով եւ ֆինանսավորմամբ, «Ռոբերտ Սահակյանց փրոդաքշըն» ստուդիան սկսեց նկարահանել «Անահիտ» լիամետրաժ անիմացիոն մուլտֆիլմը` Ղազարոս Աղայանի համանուն հեքիաթի հիման վրա:

Yerkir.am-ի հետ զրույցում ռեժիսոր-մուլտիպլիկատոր Դավիթ Սահակյանցը նշեց, որ մուլտֆիլմը գրեթե պատրաստ է, իսկ պրեմիերան նախատեսվում է հոկտեմբեր կամ նոյեմբեր ամսին:

«Մուլտֆիլմն այժմ հետարտադրական վիճակում է` ձայնային էֆեկտներն են կարգավորում, ու հինգ երգից վերջինն ենք պատրաստում: Կարծում եմ` մուլտֆիլմը մոտավորապես կլինի նոր լիամետրաժ հեքիաթ, որը, պահպանելով հայկական անիմացիային բնորոշ բոլոր առանձնահատկությունները, միաժամանակ նաև նորագույն մոտեցումներն է ընդգրկել»,- ասաց Սահակյանցը:

Ըստ նրա` իրենք առավելագույնս արել են այն, ինչ ցանկանում էին ստանալ:

«Անահիտ» մուլտֆիլմի կոմպոզիտորն Արմեն Մարտիրոսյանն է, իսկ հերոսներին հնչյունավորել են Ռաֆայել Քոթանջյանը, Շուշան Պետրոսյանը, Հրանտ Թոխատյանը, Նազենի Հովհաննիսյանը, Վարդան Զադոյանը, Խորեն Լևոնյանը: Երգերը կատարում են Շուշան Պետրոսյանը, Տիգրան Պետրոսյանը, Գոռ Սուջյանը, Նիկ Էգիբյանը, Հասմիկ Կարապետյանը, ինչպես նաեւ «Ակունք» ազգագրական համույթը: