″Անահիտ″ մուլտֆիլմի պրեմիերան` 1 տարուց

2010թ., ՀՀ մշակույթի նախարարության պատվերով եւ ֆինանսավորմամբ, «Ռոբերտ Սահակյանց փրոդաքշըն» ստուդիան սկսեց նկարահանել «Անահիտ» լիամետրաժ անիմացիոն մուլտֆիլմը` Ղազարոս Աղայանի համանուն հեքիաթի հիման վրա:

Yerkir.am-ի հետ զրույցում ռեժիսոր-մուլտիպլիկատոր Դավիթ Սահակյանցը նշեց, որ ֆիլմի պրեմիերան պատրաստվում են 2014-ի նոյեմբերին անել:

«Ֆիլմը գրեթե պատրաստ է /նկարահանման առումով/: Մյուս տարի մենք տրամադրելու ենք փոստփրոդաքշընին /8 ամիս/, ինչը շատ ժամանակատար եւ կարեւոր գործընթաց է: Ուզում ենք, որ գունաբաժանումը շատ գրագետ ձեւով լինի արված, չհաշված` ձայնը»,- ասաց Սահակյանցը:

Ըստ նրա` ֆիլմը պետք է լինի 100 տոկոսանոց որակով, որ հնարավորություն ունենան հետագայում այն ցույց տալ նաեւ արտասահմանում:

«Անահիտ» մուլտֆիլմի կոմպոզիտորն Արմեն Մարտիրոսյանն է, իսկ հերոսներին հնչյունավորել են Ռաֆայել Քոթանջյանը, Շուշան Պետրոսյանը, Հրանտ Թոխատյանը, Նազենի Հովհաննիսյանը, Վարդան Զադոյանը, Խորեն Լևոնյանը: Երգերը կատարում են Շուշան Պետրոսյանը, Տիգրան Պետրոսյանը, Գոռ Սուջյանը, Նիկ Էգիբյանը, Հասմիկ Կարապետյանը, ինչպես նաեւ «Ակունք» ազգագրական համույթը: