Դժվարանում եմ հավատալ, որ Լեւոն Հայրապետյանը կարող է առնչություն ունենալ որեւէ հակաօրինական գործողության հետ. Գալուստ Սահակյան

Գործարար Լեւոն Հայրապետյանի կալանավորումը, հասկանալի է, մեծ աղմուկ բարձրացրեց ՀՀ-ում եւ ԼՂՀ-ում: Գնահատականներն ու տեսակետները այս ամենի վերաբերյալ տարբեր էին: Yerkir.am-ը Հայրապետյանի կալանավորման վերաբերյալ փորձել է լսել նաեւ ԱԺ նախագահ Գալուստ Սահակյանի կարծիքը:

«Անձամբ եմ ճանաչում Լեւոն Հայրապետյանին եւ բարձր եմ գնահատում նրա բարեգործությունը հայրենիքում: Ես դժվարանում եմ հավատալ, որ նա կարող է առնչություն ունենալ որեւէ հակաօրինական գործողության հետ: Ինչեւէ, ավելի օբյեկտիվ կարծիք հայտնելու համար անհրաժեշտ է հետեւել նախաքննության ընթացքին: Յուրաքանչյուր հայ մարդ, բնականաբար, պատրաստ է օրենքի շրջանակում սատարել Լեւոն Հայրապետյանին»,- ի պատասխան մեր հարցի, ասաց ԱԺ նախագահը:

Հիշեցնենք, որ լրագրողների հետ զրույցում, անդրադառնալով Հայրապետյանի կալանավորմանը, ՀՀ վարչապետ Հովիկ Աբրահամյանը հայտարարել էր. «Կարող են Լեւոնին բռնել, վաղը՝ Բարխուդարին, էն մյուս օրը՝ Սիմոնին, ի՞նչ կապ ունի ինձ հետ, ընդհանրապես: Մենք շատ շնորհակալ ենք բոլոր բարերարներին, բայց եթե մարդիկ օրենք են խախտում եւ կալանավորվում են, մենք ի՞նչ անենք»: