Պահանջում ենք, որովհետև բանը բանից անցել է. Արմեն Ռուստամյանը՝ Սերժ Սարգսյանի հայտարարությունների մասին

Այսօր լրագրողների հետ զրույցում ԱԺ ՀՅԴ խմբակցության ղեկավար Արմեն Ռուստամյանը, խոսելով ՀՀ նախագահ Սերժ Սարգսյանի` երեկվա հարցազրույցի մասին, որում խոսվել է նաև քառյակի 12 պահանջների մասին, ասաց, որ քառյակը պահանջում է, որովհետև համագործակցության հետ կապված բոլոր հնարավոր քայլերն արդեն կատարել են:

Հիշեցնենք, որ երեկ ՀՀ նախագահ Սերժ Սարգսյանը, խոսելով քառյակի 12 պահանջների մասին, կարծիք է հայտնել, որ եթե դա համագործակցության փաստաթուղթ է, ուրեմն պետք է հանել «պահանջել» բառը:

Արմեն Ռուստամյանի խոսքով` մինչ հիմա քննարկումների ամբողջ ուղղությունն այն էր, որ մղեն կառավարությանը համագործակցության դաշտ, որտեղ հատման եզրեր կգտնվեն, բայց բառերի հետևից պետք չէ ընկնել, պետք է նայել բովանդակությանը:

«Եթե նայենք բովանդակությանը, ապա մենք սպասում ենք ավելի լուրջ պատասխան` կապված այդ կետերի իրական կամ ոչ իրական լինելու հետ: Այո, պահանջում ենք, որովհետև բանը բանից անցել է, այդ 12 կետերը պահանջներ են, որոնք հասարակությունն է ներկայացնում»,- ասաց Արմեն Ռուստամյանը` հավելելով, որ պատասխանն ադեկվատ չէր այն լրջությանը, որով քառյակը մոտեցել է 12 կետանոց փաստաթղթին:

Նա նշեց, որ 12 կետերը հապճեպ չեն կազմվել, հապճեպը կառավարության ներկայացրած նախագծերն են, որովհետև մինչ հիմա անգամ նախագծերը չկան դրված պատգամավորների սեղաններին:

«Լուրջ չեն վերաբերվում 12 կետերին, դրա համար էլ վիճակն այսպիսին է: Եթե խոսում են ականջալուր լինելու մասին, բայց պետք է մեր առաջարկները լուրջ չընդունեն, դա ճիշտ չէ»,- ասաց Արմեն Ռուստամյանը: