Վոլգոգրադում թուրք ահաբեկիչ է ձերբակալվել

Վոլգոգրադի շրջանում ձերբակալվել է Թուրքիայի քաղաքացի՝ ահաբեկչական կազմակերպությունների ֆինանսավորումը, ղեկավարումը և նյութատեխնիկական ապահովումը կազմակերպելու կասկածանքով: Նրա նկատմամբ Ինտերպոլը միջազգային հետախուզում էր հայտարարել անցած տարվա դեկտեմբերին. հայտնում է РИА Новости-ն:

Տեղեկության համաձայն՝ ձերբակալվածը ավտոմեքենայով դեպի Դոնի Ռոստով է գնալիս եղել: Նրան կանգնեցրել են անցակետերից մեկում: Փաստաթղթերը ստուգելու ժամանակ նա ներկայացել է որպես բուհերից մեկի ասպիրանտ:

Հիշեցնենք, որ անցած տարի Վոլգոգրադում երեք խոշոր ահաբեկչություն է տեղի ունեցել: 2013-ի  հոկտեմբերին մահապարտ ահաբեկիչը պայթեցրել էր ավտոբուս, ինչի հետևանքով մահացել էր մի քանի մարդ: Տարեվերջին ահաբեկիչները երկու պայթյուն էին իրականացրել երկաթուղային կայարանում և տրոլեյբուսում: Ահաբեկչությունների հետևանքով 34 մարդ էր մահացել, 60 մարդ՝ հոսպիտալացվել: