Իշխանության «լյուբիմչիկի» նամակը` Ալիեւին

Տավուշի մարզպետի նախկին խորհրդական Լյուբիկ Չիբուխչյանի «պատմությունը» շատ հետաքրքիր է և, իբրև արտառոց երևույթ, կարող է հետաքրքրել ոչ միայն հոգեբույժներին ու հոգեբաններին: Բայց այդ «պատմությունը» նաև խիստ խորհրդանշական է: Այս մարդը, որ «170 գրքի հեղինակ է, որ երեք տարեկանում տառեր է հորինել, չորսում՝ գիրք հրապարակել, իսկ պատանության տարիներին իր` Չիբուխչյան տոհմն է հավերժացրել՝ ստեղծելով «չիբու» մարտարվեստը», կամաց-կամաց, ինքն էլ չպատկերացնելով, դառնում է մեր իրականության, ավելի ստույգ՝ իշխանությունների յուրօրինակ սիմվոլը:

Ակնհայտորեն և առնվազն հոգեբանի կարիք ունեցող մարդը, որ մի ամբողջ պոեմ է նվիրել ադրբեջանցի երգչուհուն՝ արվեստը սահմաններ ու թշնամություն չի ճանաչում «ծրագրի» սահմաններում, մարդը, որ իր երկրի նախագահին, քրիստոնեական խորհրդաբանությանը հավատարիմ, 12 անպատասխան նամակներ է գրել, հիմա էլ նամակ է գրում Ադրբեջանի նախագահին և նրանից քաղաքական ապաստան խնդրում: Պատճա՞ռը` մարդուն ազատել են մարզպետի խորհրդականի պաշտոնից, դե նա էլ դիմել է… Հեյդարիչին:

Սակայն ամենազավեշտալին այս «պատմության» մեջ թերևս այն է, որ Լյուբիկը ՀՀԿ-ական է, ակներևաբար՝ ՀՀԿ մեծավորների երբեմնի «լյուբիմչիկներից», եթե հաջողել է գրավել այնպիսի «պատասխանատու» պոստ, ինչպիսին խորհրդականինն է:

Ահա և մենք հասանք ամբողջ այս բանդագուշանքի բուն նյութին: Ուրեմն` Լյուբիկ Չիբուխչյանը Տավուշի մարզպետին տարիներ շարունակ… խորհուրդնե՜ր է տվել: Հետևաբար, միայն պատկերացնել կարելի է այն նսեմ վիճակը, որին մեր իշխանավորների կամքով հասել է խորհրդականի ինստիտուտը. հոգեպես անառողջ մարդը տարիներ շարունակ խորհուրդներ է տվել ու… ծիծաղե՜լ այդ ինստիտուտի վրա: Լ. Չիբուխչյանի պարագայում ծիծաղելը բնավ չի բացառվում, որովհետև նա, ինչպես ասացինք, առողջական խնդիրներ ունի:

Բայց ամբողջ զավեշտն այն է, որ, ի դեմս Լյուբիկի ու իշխանության լյուբիմչիկների, հանրությունն է ծիծաղում նրանց վրա, և այդպիսով ծիծաղելի է դառնում խորհրդականի ինստիտուտն ու խորհրդականն ինքը: Իսկ ո՞վ է հաշվել, թե քանի խորհրդական կա Հայաստանում:

Բ. Գասպարյան

Լուսանկարը` Aravot.am-ի