Ծիրանի գինը կկազմի 1500 դրամ

Ազգային ժողովի ԲՀԿ խմբակցության պատգամավոր Լյովա Խաչատրյանը կարծում է, որ կառավարության ծրագրով նախանշված` համայնքների խոշորացման ծրագիրը շատ նուրբ հարց է, որը պետք է քննարկվի համայնքների բնակչության հետ: «Ես կողմ եմ համայնքների խոշորացման միայն մեկ տարբերակին. նախկին վարչական շրջանների ստեղծման օրինակով լինի, շրջանների վերականգման սկզբունքով համայնքների խոշորացում լինի»,- ասաց Լյովա Խաչատրյանը:

Նրա գնահատմամբ` այդ դեպքում համայնքները համաձայն կլինեն խոշորացմանը, բայց երբ ցանկանում են երեք գյուղ միացնել, եթե այդ գյուղերը հակասություններ ունեն, իհարկե բնակիչները չեն համաձայնի:

Yerkir.am-ի այն հարցին, թե ի՞նչ պետք է անի կառավարությունը, որ մի փոքր կասեցվի գյուղացիների արտագաղթը, Լյովա Խաչատրյանը պատասխանեց. «Առաջին հերթին վարկային ամնիստիա, սուբսիդավորված վարկերի ծավալի շեշտակի աճ: Այնինչ` կառավարության ծրագրով մասնակի աճ է նախատեսված»:

Լյովա Խաչատրյանին հարցրեցինք նաև, թե կարկտահարության հետևանքով որքան կկազմի ծիրանի գինը: Պատգամավորը պատասխանեց. «Ծիրանի գինը կկազմի 1500 դրամ»:

Նշենք, որ գյուղնախարարը հայտարարել էր, որ թեև եղել են կարկտահարություն ու ցրտահարություն, որոնց պատճառով ծիրանի բերքը տուժել է, սակայն ծիրան կլինի և անգամ փոքր ծավալով կարտահանվի: