Արմավիրի մարզպետը կողմնակից է գյուղացիական կոոպերացիաներին

Արմավիրի մարզպետ Աշոտ Ղահրամանյանն իր մարզի ամենասուր հարցը համարում է ոռոգման ջրի խնդիրը:

Yerkir.am-ի հարցին, թե ի՞նչ թերություններ է տեսել կառավարության ծրագրում, նա պատասխանեց. «Թերություն չեմ նկատել»: «Ուրեմն անթերի ծրագիր է՞»,- հարցրեցինք: Պատասխանեց. «Համենայն դեպս, լավագույն ծրագրերից է»:

Մարզպետը նշեց, որ կողմ է ծրագրով նախատեսված` համայնքների խոշորացման գաղափարին, քանի որ այդպիսով համայնքները կդառնան ֆինանսապես ավելի ամուր: Ինչ վերաբերում է կառավարության ծրագրով նախատեսված` գյուղացիական կոոպերացիաների խթանման անհրաժեշտությանը, Աշոտ Ղահրամանյանը նշեց, որ դարձյալ կողմնակից է այդ գաղափարին, քանի որ կոոպերատիվների ստեղծումը, համայնքների խոշորացումը հնարավորություն կտան միավորելոջ հողատարածքները, իսկ փոքր հողատարածքներում մեծ տեխնիկայի օգտագործումը  լուրջ խնդիրներ  է առաջացնում:

«Երբ հողերի սեփականաշնորհում եղավ, հողերի 10 տոկոսն անցավ կա'մ առուներին, կա'մ ճանապարհների տակ, իսկ կոոպերատիվները հնարավորություն կտան մարդկանց իրենց հողատարածքները միացնելու և համատեղ մշակելու»,- ասաց մարզպետը` հավելելով, որ մեծ առևտրային կազմակերպություններ կան, որոնք ցանկանում են պայմանագրեր կնքել ոչ թե փոքր, այլ խոշոր հողատերերի կամ կոոպերատիվների հետ: