ԲՀԿ-ի առաջարկների 90 տոկոսը կառավարությունն ընդունել է

Այսօր լրագրողների հետ ճեպազրույցում ԱԺ ԲՀԿ խմբակցության պատգամավոր Միքայել Մելքումյանը, խոսելով կառավարության ծրագրի մասին, նշեց, որ այն հանգրվանային ծրագիր է, որի վրա հենվելով` կառավարությունը ցանկանում է հետագայում ավելի համարձակ քայլեր կատարել:

Նա նշեց, որ ծրագրում կան դրական բաներ, բայց այն կարող էր ավելի հագեցած լինել: Ըստ պատգամավորի`  կառավարության ծրագիրը կազմելիս ԲՀԿ բազմաթիվ առաջարկներ, մասնավորապես` առաջարկների մոտ 90 տոկոսը ընդունվել է: Բողոքը կապված է հարկային քաղաքականության հետ,  նաև այն բանի, որ ծրագրում բացակայում է ծրագրի կատարման երաշխիքների մասին դրույթը:

«Շատ կարևորում եմ` ծրագրի կատարման քաղաքական կամք կդրսևորի՞ այս կառավարությունը, թե՞ ոչ, որովհետև նախորդ կառավարության ծրագիրն էլ վատը չէր: Կհաջողի՞ նոր կառավարությանը: Եթե վարչապետը և մի շարք առանցքային նախարարներ չունենան քաղաքական որոշումների վրա գոնե հիսուն տոկոս ազդեցություն, ապա տխուր հեռանկար մոտակայում կունենանք»,- ասաց Միքայել Մելքումյանը: