Թուրքիայի ածխահանքում ավարտվել են որոնողափրկարարական աշխատանքները. 301 զոհ

Թուրքիայի Սոմա բնակավայրի ածխահանքում ավարտվել են որոնողափրկարարական աշխատանքները: Այս մասին հայտնում է CNN-ը: Հանքում մայիսի 13-ին տեղի ունեցած պայթյունի ու հաջորդած հրդեհի զոհերի վերջնական թիվը 301 է: Պատահարից ողջ մնալ է հաջողվել 485 հանքափորի:

Թուրքիայի էներգետիկայի նախարար Թաներ Յըլդըզի խոսքով՝ փրկարարները մանրակրկիտ ստուգել են դեպքի վայրը, սակայն այլևս չեն գտել ո'չ զոհերի մարմիններ, ո'չ էլ ողջ մնացածների: Յըլդըզի խոսքով՝ դեռ չափազանց վաղ է խոսել պայթյունի պատճառների մասին:

Երկրի կառավարությունը պնդում է, թե նման մասշտաբի աղետի պատճառը պաշտոնեական անփութությունը չէ, քանի որ հանքում պարբերաբար կատարվել են ստուգումներ: Հանքը շահագործող ընկերությունն էլ հայտարարել է, թե շատ հանքափորներ թունավորել են հրդեհից առաջացած գազերից, քանի որ չեն ունեցել հակագազեր:

Աղետից հետո Թուրքիայի շատ քաղաքներում անցկացվել են բողոքի ակցիաներ, որոնց մասնակիցները հայտարարել են, որ իշխանությունները բավարար միջոցներ չեն ձեռնարկում՝ հանքափորների անվտանգությունն ապահովելու համար: