«Կուտակային կենսաթոշակների մասին» օրենքը երկրորդ ընթերցմամբ ընդունվեց

Այսօր ԱԺ նիստում քվեարկության դրվեց կառավարության կողմից ներկայացված «Կուտակային կենսաթոշակների մասին» ՀՀ օրենքում փոփոխություններ անելու մասին նախագիծը երկրորդ ընթերցմամբ ընդունելու մասին հարցը:

Քվեարկությունից առաջ վարման կարգով հանդես եկավ ՕԵԿ-ական պատգամավոր Հովհաննես Մարգարյանը` ասելով, որ ՕԵԿ-ը ներկայացրել էր առաջարկ` այդ նախագծի հետ կապված: ԱԺ նախագահ Գալուստ Սահակյանն ու ՀՀԿ-ական պատգամավոր Հակոբ Հակոբյանն ասացին, որ երեկ հիմնական զեկուցող` ՀՀ աշխատանքի և սոցիալական հարցերի նախարար Արտեմ Ասատրյանը հայտարարել է, որ ՕԵԿ-ի առաջարկը չի ընդունվել:

Արձագանքելով` Հովհաննես Մարգարյանը նշեց, որ, հաշվի առնելով նաև այդ հանգամանքը, որ ՕԵԿ-ի առաջարկը կառավարությունը չի ընդունել, ՕԵԿ-ը դեմ է քվեարկելու նախագծին:

Քվեարկությամբ` 67 կողմ, 29 ձեռնպահ և 18 դեմ ձայներով, կառավարության նախագիծն ընդունվեց: