Երևանում ստեղծված տուֆակերտ քանդակներն ուղևորվեցին Ստեփանակերտ

Երևանի Փանոս Թերլեմեզյանի անվան գեղարվեստի պետական քոլեջի 12 ուսանող կարմիր տուֆից 6 քանդակ է ստեղծել՝ որպես նվեր Ստեփանակերտին:

Քանդակներն արդեն տեղափոխվում են Երևանի քույր քաղաք Ստեփանակերտ և կդրվեն պուրակներում: Տեղադրման նախապատրաստական աշխատանքները կտևեն ևս 2-3 շաբաթ։

«Խմբի գեղարվեստական ղեկավարը ևս մեկնում է ԼՂՀ, որտեղ Ստեփանակերտի քաղաքապետի և քաղաքապետարանի համապատասխան աշխատակիցների հետ քննարկելու են տեղադրման վայրերը՝ ըստ թեմատիկ առանձնահատկության։ Օրինակ` նուռը ձեռքին երեխայի քանդակը հեղինակն առաջարկում է տեղադրել ծննդատան բակում»,- ասել է Թերլեմեզյանի անվան գեղարվեստի պետական քոլեջի տնօրեն Աննա Մնացականյան-Առուշանյանը։

«Բոլոր քանդակների վրա մեր հոգու գենետիկ գաղտնաբառերն են՝ արևախաչեր, քրիստոնեական խաչեր, հայկական խորհրդանիշեր»,- նշել է քոլեջի դասախոս Իսահակ Ապրեյանը։

Քանդակների ստեղծմանն աջակցել է Երևանի քաղաքապետարանը: Այս մասին հայտնում է քաղաքապետարանի տեղեկատվության և հասարակայնության հետ կապերի վարչությունը: