Եթե Սլավյանսկում չեչեն զինվորներ լինեին, Ավակովը անգամ Կիևից ստիպված կլիներ փախչել. Կադիրով

Արևելյան Ուկրաինայում չեչեն զինվորներ չկան: Այդ մասին հայտարարել է Չեչնիայի ղեկավար Ռամզան Կադիրովը՝ մեկնաբանելով ուկրաինական կողմի համապատասխան հայտարարությունները. հայտնում է Эхо Москвы-ն:

«Կիևի իշխանություններն իրենց պատժիչ գործողությունները Սլավյանսկում փորձում են արդարացնել քաղաքի պաշտպանների շրջանում չեչեն զինվորների առկայությամբ: Դա աբսուրդ է: Եթե դա իսկապես այդպես լիներ, վստահեցնում եմ ձեզ,  այդ հայտարարություններ անողները վաղուց կփախչեին ոչ միայն Սլավյանսկից, այլ նաև Կիևից, որում, ըստ էության, չեն էլ իշխում»,- ասել է նա:

«Ցանկանում եմ հանգստացնել Ավակովին և բոլոր նրանց, ովքեր մուգ մարդկանց մեջ չեչեն են տեսնում:  Մուգ լինել չի նշանակում պարտադիր չեչեն լինել: Նա պետք է որ իմանար, որ չեչենները կապտաչյա և բաց մազերով էլ են լինում»,- ասել է նա: