Հայաստանում ՀԿ-ները գրանցվում և գործում են ՀՀ օրենսդրության շրջանակներում. ԱԳՆ-ի պատասխանը՝ ՀՀ-ում ՌԴ դեսպանի հայտարարությանը

Այսօր ՀՀ-ում Ռուսաստանի դեսպանը արդեն երկրորդ սկանդալային հայտարարությունն է արել: Խոսելով Հայաստանում գործող` հակառուսական տրամադրություններ ունեցող հասարակական կազմակերպությունների մասին, դեսպանն ասել էր. «Ես վստահ եմ, որ Ռուսաստանին հարկ է ավելի գործուն հայտարարել Հայաստանի տեղեկատվական դաշտում իր ներկայության մասին։ Սրանում ոչ մի կասկած չկա։ Սակայն զբաղվել Հայաստանի տարածքում գործող այն ոչ կառավարական կազմակերպությունների չեզոքացմամբ, որոնք ցանկանում են սեպ խրել ռուս-հայկական հարաբերություններում, ըստ ամենայնի՝ հարկ է՝ օգտագործելով նաև այլ մեթոդներ։ Ռուսաստանում, ի դեպ, ընդունված է օրենք, որը միանգամայն հստակ կարգավորում է ոչ կառավարական կազմակերպությունների գործունեությունը»:

Այս հայտարարությունից հետո ՀՀ ԱԳՆ-ն, ի պատասխան «Ազատություն» ռադիոկայանի հարցի, թե ինչպե՞ս է մեկնաբանում դեսպանի այս հայտարարությունները, տարածել է ԱԳ նախարար Էդվարդ Նալբանդյանի հետևյալ հայտարարությունը. «Չեմ կարծում, որ որևիցե հասարակական կազմակերպություն ի զորու է սեպ խրել Հայաստանի և Ռուսաստանի միջև՝ երկու ժողովուրդների դարավոր բարեկամության վրա հիմնված և ժամանակի փորձությունն անցած, դաշնակցային հարաբերություններում։ Հայաստանում բոլոր կազմակերպությունները գրանցվում և գործում են ՀՀ օրենսդրության շրջանակներում»: