Ադրբեջանում Կարմիր խաչի աշխատակիցներն այցելել են հայ գերիներին

Կարմիր խաչի միջազգային կոմիտեի աշխատակիցներն ապրիլի 29-ին այցելել են Ադրբեջանում գտնվող հայ ռազմագերի Հակոբ Ինջիղուլյանին և 5-հոգանոց հայ ընտանիքին։ Այս մասին հայտնում է ադրբեջանական АПА գործակալությունը՝ վկայակոչելով  Ադրբեջանում Կարմիր խաչի ներկայացուցչության հասարակայնության հետ կապերի բաժնի ղեկավար Իլահա Հուսեյնովային։

Տեղեկության համաձայն՝ Կարմիր խաչի միջոցով գերիներին և նրանց ընտանիքներին տեղեկություն է փոխանցվել։

 Ադրբեջանում պահվող ՀՀ քաղաքացիներ Եղիշե, Ռուզաննա, Ալֆրեդ, Գայանե և Պետրոս Գևորգյանները նույն ընտանիքի անդամներ են, որոնք ադրբեջանական սահմանը հատել էին 2010-ի հունվարին։ Նրանք ցանկանում էին երրորդ երկիր մեկնել։ Հակոբ Ինջիղուլյանը գերի էր ընկել օգոստոսի 7-ի լույս 8-ի գիշերը։