ՀՀԿ-ում չեն կողմնորոշվում՝ ԲՀԿ-ից հրավեր ստացե՞լ են, թե՞ ոչ

Ոչ իշխանական չորս ուժերը վաղը Ծաղկաձորում տնտեսական համաժողով կանցկացնեն` մշակելու համար տնտեսական այն պլատֆորմը, որը պետք է ներկայացնեն նոր ձևավորվող կառավարությանը:

Yerkir.am-ի հետ զրույցում ԱԺ տնտեսական հարցերի մշտական հանձնաժողովի նախագահ, ԱԺ ՀՀԿ խմբակցության պատգամավոր Վարդան Այվազյանն ասաց. «Հանրապետականին հրավիրել են: Կքննարկենք, և եթե որոշում լինի, կմասնակցենք այդ համաժողովին»:

ԱԺ սոցիալական հարցերի հանձնաժողովի նախագահ, ԱԺ ՀՀԿ խմբակցության պատգամավոր Հակոբ Հակոբյանը տեղյակ չէր այդ համաժողովից: Նա նշեց, որ իրեն մասնակցության հրավեր չի ուղարկվել, իսկ եթե հրավիրեն էլ, չգիտի` կգնա՞, թե՞ ոչ:

ԱԺ տնտեսական հարցերի հանձնաժողովի ՀՀԿ-ական անդամ Վահրամ Բաղդասարյանը նույնպես տեղյակ չէր  և հրավեր չէր ստացել: «Ծրագիրը կնայեմ, կասեմ` կգնա՞մ, թե՞ ոչ: Էնքա՜ն տնտեսական ֆորումներ են կազմակերպվում, ես ի՞նչ իմանամ ինչ ծրագիր ունի»,- ասաց նա:

Նույն հարցին Գալուստ Սահակյանն էլ պատասխանեց. «Եթե հրավիրեն, ում որ հրավիրեն, կարծում եմ` կմասնակցեն այդ համաժողովին, բայց մենք դեռ հրավեր չենք ստացել»: