Միգրացիոն պետական ծառայության համակարգիչներն ու տպիչները «բարոյապես մաշված են»

Հայաստանի Հանրապետության տարածքային կառավարման նախարարության միգրացիոն պետական ծառայությունը վաղը կառավարությունից 1 միլիոն 600 հազար դրամ կստանա` համակարգչային և պատճենահանող սարքավորումների ձեռք բերման համար:

Կառավարության որոշման նախագծի հիմնավորումներում նշվում է. «Միգրացիոն պետական ծառայության աշխատակազմին տարիներ շարունակ «Վարչական սարքավորումներ» ծախսային հոդվածով գումարներ չի նախատեսվել, որի հետևանքով ծառայությունում եղած համակարգիչները և տպիչ սարքերը ֆիզիկապես և բարոյապես մաշված են, դրանց հետագա օգտագործումը տնտեսապես շահավետ չէ»:

Ուստի նոր համակարգչային տեխնիկայի ու տպիչ սարքերի ձեռքբերումը կապահովի ծառայության աշխատակազմի բնականոն և անխափան աշխատանքային գործունեությունը: