Տարոն Մարգարյանի «սենսացիոն» հայտարարությունը տրանսպորտի ուղեվարձի բարձրացման մասին

Երևանի ավագանու հերթական նիստում քաղաքապետ Տարոն Մարգարյանը «սենսացիոն» հայտարարությամբ է հանդես եկել:

«Պաշտոնապես հայտարարում եմ, որ ուղեվարձը այս տարվա ապրիլի 1-ից չի թանկանալու», - ասել է քաղաքապետն ու նմանատիպ տեղեկություններ տարածողներին հորդորել գուշակությամբ չզբաղվել:

Yerkir.am- Տարոն Մարգարյանի այս հայտարարությունը ոչ թե մեծահոգության, այլ երկրում ստեղծված սոցիալ-տնտեսական ծանր վիճակի պարագայում մարդկանց էլ ավելի չբորբոքելու հետեւանք է:

Մենք դեռ ամիսներ առաջ էինք գրել, որ, ամենայն հավանականության, ուղեվարձը կբարձրանա մարտ-ապրիլ ամիսներին, երբ ժողովուրդը թեթեւացած կլինի գազի եւ էլեկտրաէներեգիայի համար վճարումներից: Բայց ի՞նչ իմանար Տարոն Մարգարյանը, որ կբարձրանա բողոքի նոր ալիք՝ կապված կենսաթոշակների հետ:

Մեր տեղեկություններով` հենց այս հարցի հետ կապված էլ Տարոն Մարգարյանին հասկացրել են, որ այս լարված պահին մտածել անգամ չի կարող ուղեվարձի բարձրացման մասին: Այս պահին քաղաքապետը սպասում է այդ հարցի հանգուցալուծմանը, որից էլ կախված կլինի տրանսպորտի թանկացման հետագա ընթացքը:

Լավագույն դեպքում` քաղաքապետը մտածում է հուլիսին թանկացնելու տարբերակի մասին, երբ նախատեսվում է աշխատավարձերի բարձրացում: