Վարչապետի համար գաղտնիք չէ, որ 500 հազար թոշակառուներից 350 հազարն առնչվում են աղքատության խնդրի հետ

Կառավարության այսօրվա նիստի վերջում վարչապետ Տիգրան Սարգսյանը աշխատանքի ու սոցիալական հարցերի նախարար Արտեմ Ասատրյանից հետաքրքրվեց, թե այս տարվա հունվարի 1-ից կենսաթոշակների բարձրացումն ի՞նչ ազդեցություն է թողնում Հայաստանում աղքատության կրճատման վրա:

«Քանի որ գաղտնիք չէ, որ 550 հազար թոշակառուներից 350 հազարն առնչվում են աղքատության խնդրի հետ, և մենք, այս տարվա հունվարի 1-ից 15 տոկոսով բարձրացնելով թոշակները, այնպիսի վերաբաշխում կատարեցինք, որպեսզի առաջին հերթին կարողանանք բարձրացնել առավել ցածր թոշակ ստացողների թոշակները»,- նշեց Տիգրան Սարգսյանը:

Նախարար Ասատրյանը նշեց, որ 2014 թվականի բյուջեում ներառվեց 29 միլիարդ դրամ միայն աշխատանքային կենսաթոշակների բարձրացման նպատակով, և վերլուծությունները հիմք հանդիսացան, որպեսզի ԱԺ-ին ներկայացվի թոշակների հաշվարկման կարգի հետ կապված փոփոխություն ու հիմնական շեշտադրումը արվի առավել աղքատ կենսաթոշակառուների կենսաթոշակների բարձրացմանը:

Մինչեւ 2014 թվականի հունվարի 1-ը, ըստ նախարարի, Հայաստանում կար 68 հազար կենսաթոշակառու, ովքեր ստանում էին ծայրահեղ աղքատության գծից ցածր կենսաթոշակ, 230 հազար կենսաթոշակառու, ովքեր ստանում էին աղքատության ստորին գծից ցածր կենսաթոշակ, և 333 հազար կենսաթոշակառու, ովքեր ստանում էին աղքատության վերին գծից ցածր կենսաթոշակ:

Ընդ որում` հաշվի են առնվել նաև գնաճային կանխատեսումները:

«Բարձրացման  արդյունքում շուրջ 5 անգամ պակասեց ծայրահեղ աղքատության գծից ցածր կենսաթոշակներ ստացողների թիվը: Հունվարի 1-ի դրությամբ` նրանց թվաքանակը կազմում է 12 հազար 800 կենսաթոշակառու: 230 հազար անձանցից, ովքեր ստանում էին աղքատության ստորին շեմից ցածր կենսաթոշակ, ունենք 138 հազար 300 անձ, ովքեր ստանում են աղքատության ստորին շեմից ցածր կենսաթոշակ: Այսինքն' շուրջ 40 տոկոսով նվազել է ստորին շեմից ցածր կենսաթոշակ ստացողների թիվը: Եվ 333 հազար անձ, ովքեր ստանում էին աղքատության վերին շեմից ցածր կենսաթոշակ, մենք ունենք 292 հազար անձ` բարձրացումից հետո»,- ասաց նախարարը' նշելով, թե թիրախավորված բարձրացումը էապես նվազեցրեց կենսաթոշակառուների շրջանում աղքատության մակարդակը:

Վարչապետն այս առումով նշեց, որ հասկանալի է` կենսաթոշակների չափերի բարձրացումը դեռևս շոշափելի չէ: «Հատկապես հաշվի առնելով այն հանգամանքը, որ այս տարի աննախադեպ ցուրտ ձմեռ էր, և քաղաքացիները ստիպված եղան ավելի շատ էլեկտրաէներգիա ու գազ ծախսել, քան նախորդ տարի, և հիմնականում այս թոշակների բարձրացումներ ուղղվելու են այդ ծախսերին, բայց, այնուամենայնիվ, դրանք շոշափելի փոփոխություններ են, և այս ռազմավարությունը մենք պետք է շարունակենք' այն դիտարկելով, որպես աղքատության կրճատման արդյունավետ գործիք»,- նշեց Տիգրան Սարգսյանը: