Հայ պաշտոնյաները վախից փոխեցին իրենց ոսկե զուգարանները

Ցանկացած համագործակցություն ընդդիմության մեջ ողջունելի է, որովհետև չէինք ուզենա գնալ Եվրամայդանի ճանապարհներով, այն Հայաստանի համար կործանարար կլինի. կարծում է ընդդիմադիր քաղաքական գործիչ Գուրգեն Եղիազարյանը՝ խոսելով ոչ իշխանական քաղաքական չորս ուժերի համագործակցության մասին:

Սակայն, ըստ նրա, այդ քառյակի համագործակցությունը երկար չի պահպանվի: «Այդ չորսից կմնա երկու կուսակցություն, չեմ ասի, թե որոնք կմնան, դա էլ իմ գաղտնիքն է»,- ասաց Գուրգեն Եղիազարյանը:

Նրա խոսքով` ամեն սովորական քաղաքացի ամեն օր արթնանում է՝ հասկանալով, որ ավելի վատ է ապրում, և այս վիճակը չի կարող երկար պահպանվել: Մինչդեռ իշխանությունը տզրուկի նման կարմիր գծեր է քաշել ու հանիրավի 2-3 միլիոն եվրո է գրպանում՝ առանց ծառայություն մատուցելու: Գուրգեն Եղիազարյանը տարակուսում է, թե ինչո՞ւ պետք է ինքն իր քաղաքում մեքենա կայանելու համար փող մուծի ինչ-որ տզրուկի, ով ներկայացնում է երկրի նախագահի մերձավոր շրջապատը:

«Գնացեք ձեր սառնարանը բացեք, կտեսնեք, որ մուկը մտել է այնտեղ ու ինքնասպան է եղել, որովհետև ուտելիք չկա: Սերժ Սարգսյանն էլ է հասկացել որ կառավարման իր էքսպերիմենտը չի ստացվել: Երբ ցույց տվեցին Յանուկովիչի ոսկե զուգարանը, մեր հայ պաշտոնյաները վախից գնացին, փոխեցին իրենց ոսկե զուգարանները»,- ասաց Գուրգեն Եղիազարյանը: