Ոստիկաններն առանց փրկարարների են փնտրում Մոսոյի ենթադրյալ դին

Արդեն մի քանի օր է, ինչ ԱԻՆ փրկարարական ծառայության աշխատակիցները չեն մասնակցում Կայարանցի Թևոսիկի եղբոր` Արթուր Սաֆարյանի սպանության մեջ կասկածվող Մովսես Ներսիսյանի դիակի որոնման աշխատանքներին: Այս մասին yerkir.am-ին հայտնեց որոնողական աշխատանքներում ներգրավված փրկարարների աշխատանքները համակարգող` ՀՀ փրկարար ծառայության տնօրենի տեղակալ, գեներալ-մայոր Վրեժ Գաբրիելյանը: Նա նշեց, որ, եթե համապատասխան մարմինները դիմեն, իրենք պատրաստ են աջակցել:

Շուրջ մեկ ամիս է` ընթանում են դիակի որոնողական աշխատանքները և, հաշվի առնելով ոստիկանության տարածած այն տեղեկությունը, որ Մովսես Ներսիսյանը սպանվել է Արթուր Սաֆարյանի սպանությունից` հունվարի 27-ից հետո, ստացվում է, որ դիակը թաքցնելու դեպքից անցել է մոտ 50 օր, ինչը բավարար ժամանակահատված էր, որպեսզի դիակը քայքայվեր: Սակայն, չնայած դրան, ոստիկանությունը չի դադարեցնում որոնողական աշխատանքները, քանի որ, առանց սպանության ապացույց հանդիսացող դիակի հայտնաբերման, իրենց բացահայտումները «ջուրը կլցվեն»:

Հարց է առաջանում` նման պարագայում ինչո՞ւ գործով կալանավորված Իսրայել Սարգսյանին առաջադրված մեղադրանքներից չի հանվում 104-րդ` սպանության հոդվածը: Իսրայել Սարգսյանի պաշտպան Գայանե Գալոյանի խոսքով` հնարավոր է, որ Մովսես Ներսիսյանը կենդանի է, և գործում չկա մի ապացույց, որը փաստի, որ նրան սպանել է իր պաշտպանյալը: Մոսոյի ողջ լինելու մասին կասկածներ է հայտնել նաև Սաֆարյանի սպանության գործով կալանավորված Տիգրան Ասատրյանի պաշտպան Վարդուհի Էլբակյանը: Նշենք, որ նա միջնորդություն էր ներկայացրել նախաքննական մարմնին իր պաշտպանյալի մասով գործը կարճելու վերաբերյալ:

Գործի նախաքննությունն իրականացնում է ՀՀ ոստիկանության հատկապես կարևոր գործերով վարչությունը: Քննչական խմբի ղեկավարն է վարչության քննիչ Հովիկ Պողոսյանը: