Թարգմանությունները պետության վրա 175 միլիոն կնստեն

Հրայր Թովմասյանն այսօր թարգմանություններ անելու նպատակով կառավարությունից լրացուցիչ 50 միլիոն դրամ ուզեց: Կառավարությունը հաստատեց արդարադատության նախարարի ներկայացրած որոշման նախագիծը, որով արդարադատության նախարարության «Թարգմանությունների կենտրոն» ՊՈԱԿ-ին գումար է հատկացվում` լրացուցիչ թարգմանություններ անելու համար:

Այս տարվա բյուջեով, ներկայացրեց Հրայր Թովմասյանը, նախատեսված է, որ «Թարգմանությունների կենտրոն» ՊՈԱԿ-ը պետք է կատարի 10 հազար 100 էջի թարգմանություն, որի համար նախատեսված է, ընդհանուր առմամբ, 125 միլիոն դրամ:

«Բայց այս պահի դրությամբ արդեն` ՊՈԱԿ-ն ունի 17 հազար 500 եւ 2 հազար` միասին`19 հազար 500 էջի թարգմանություն, եւ լրացուցիչ անհրաժեշտ է եւս 50 միլիոն դրամ: Այս 50 միլիոնը ստանալու պարագայում 1 էջի ինքնարժեքը մոտ 45-50 տոկոսով ավելի էժան կլինի, քան նախորդները` պայմանավորված վարչական ծախսերի կրճատմամբ: Օպտիմալացման արդյունքում մենք կկարողանանք 100 տոկոսով ավելացնել կատարվող աշխատանքների ծավալը, իսկ մեկ էջի ինքնարժեքն իջեցնել 45 տոկոսով»,- հայտարարեց Հրայր Թովմասյանը:

Նշենք, որ այս թարգմանությունները, ըստ կառավարությանը ներկայացված որոշման նախագծի, ուղղված են Մաքսային միությանը եւ Միասնական տնտեսական տարածքին Հայաստանի Հանրապետության անդամակցության համար պահանջվող թարգմանչական աշխատանքների իրականացմանը: