Հայաստանում ուկրաինական իրադարձությունների մասին երազում են ագրեսիվ ընդդիմախոսները. Տիգրան Սարգսյան

Ուկրաինան Հայաստանի բարեկամ երկիր է, եւ շատ ցավալի է, որ Ուկրաինայում այդպիսի դեպքեր են տեղի ունեցել:  Այս մասին այսօր լրագրողների հետ զրույցում ասաց Հայաստանի վարչապետ Տիգրան Սարգսյանը` անդրադառնալով Ուկրաինայում տեղի ունեցող իրադարձություններին:

«Մենք շահագրգռված ենք, որ, որքան հնարավոր է շուտ, գտնվեն իրավիճակի լուծման եւ գործընթացների նորմալ կարգավորման ուղիներ»,- ասաց վարչապետը:

Հարցին, թե հնարավո՞ր է, որ Յանուկովիչի կուսակիցների օրինակով մի օր ՀՀԿ-ականներն էլ հայտարարություններ անեն ՀՀ նախագահի դեմ, և այդ դեպքում ի՞նչ դիրքորոշում կունենա վարչապետը, Տիգրան Սարգսյանը պատասխանեց.  «Կարծում եմ՝ այդպիսի համեմատությունները կոռեկտ չեն, տեղին չեն: Բոլոր ագրեսիվ ընդդիմախոսները կերազեին նման սցենարի մասին: Իրատեսական չէ, որ այդ սցենարը կրկնվի Հայաստանում մի քանի պատճառներով: Մեր քաղաքական թիմի դիրքորոշումը եւ մեր քաղաքական թիմի ղեկավարության դիրքորոշումը միշտ եղել է ընդդիմախոսների հետ երկխոսության կամուրջներ կառուցելը: Մենք միշտ հանդես ենք գալիս համագործակցության օգտին»:

Նա նշեց, որ գաղտնիք չէ` երկրում կան  տնտեսական խնդիրներ, դրա մասին առաջինը խոսում է հենց կառավարությունը: Եվ, ըստ վարչապետի, կառավարության դռները միշտ բաց են համագործակցության համար: «Մեր ժողովուրդն արդեն անցել է այդ ուղին եւ դա դաս է եղել իշխանությունների եւ բոլոր կուսակցությունների համար` առանց բացառությունների: Ես վստահ եմ, որ ե'ւ կուսակցությունները, ե'ւ ժողովուրդը իմաստություն կդրսեւորեն»,- ասաց վարչապետը: