«Բուկինիստը» երեկ 1000 անուն գիրք է նվիրել

Երեկ Գիրք նվիրելու օրն էր: Օրվա առթիվ Հայաստանի մի շարք գրախանութներ գրքեր էին նվիրում իրենց գնորդներին:

Yerkir.am-ի հետ զրույցում «Բուկինիստ» գրախանութի տնօրեն Խաչիկ Վարդանյանը նշեց, որ այս տարի միջոցառումների մասնակիցների թվի աճ է նկատվել:

«Վերջին անգամ գիրք գնելու համար նման հերթ Ամանորի նախօրյակին էր, իսկ դրանից առաջ` սեպտեմբերի սկզբներին` գրենական պիտույքների բաժնում: Ցավոք, չնայած այս օրերի անցուդարձին, ընթերցողները չեն ավելանում, ընդհակառակը` ընթերցողների քանակը պակասում է: Պետք է նշեմ նաեւ, որ նման միջոցառումները նպաստում են, որ աճի գրքի նկատմամբ հետաքրքրությունը»,- ասաց Վարդանյանը:

Ի դեպ, երեկ գրախանութը շուրջ 1000 անուն գիրք է նվիրել իր գնորդներին եւ ոչ միայն գնորդներին. գրախանութը կազմակերպել էր գրքախաղ` հարցերին ճիշտ պատասխանողները գիրք էին նվեր ստանում: Երեկ սովորականից երեք անգամ ավելի գիրք է վաճառվել «Բուկինիստ»-ում, հիմնականում` մանկական ու գեղարվեստական գրքեր: