Սաղ գիտենք, թազա բան ասա. մարդիկ ձանձրանում են Րաֆֆի Հովհաննիսյանի ելույթից

Այսօր՝ փետրվարի 18-ի նախագահական ընտրություններից մեկ տարի անց, ազգային տարեկան ուղերձով հանդես եկավ «Ժառանգություն» կուսակցության նախագահ Րաֆֆի Հովհաննիսյանը: Նա հավաքվածներին խնդրեց նախ հոտնկայս հարգել անկախ հայրենիքի համար իրենց կյանքը տվածների, ինչպես նաև 2004-ի փետրվարի 19-ին ադրբեջանցի Ռամիլ Սաֆարովի կողմից սպանված հայ սպա Գուրգեն Մարգարյանի հիշատակը:

«Այսօր ազգային ապստամբության օր է»,- այնուհետեւ հայտարարեց Հովհաննիսյանը և հավելեց, որ հետընտրական պայքարը չի կորել ու  իրենք չեն լքել «մարտադաշտը»:

«Այս վերակազմավորման գործընթացն ուժեղանալու համար է»,- նշեց նա և, առակներ, նաև համաշխարհային մեծերի, այդ թվում` Նելսոն Մանդելայի խոսքերը մեջբերելով, բացատրեց ստեղծված իրավիճակը:

Հովհաննիսյանը թվեց նաև մեր երկրում ծառացած կարևորագույն խնդիրները, խոսեց կուտակային կենսաթոշակային համակարգի, գազային համաձայնագրի, ինչպես նաև Արմեն Հովհաննիսյանի սխրանքի մասին: Անդրադառնալով 2013-ի նախագահական ընտրություններին` նա հերթական անգամ նշեց ընտրակեղծիքների և ընտրագողության մասին:

«Ժառանգության» ղեկավարն առաջարկեց  սահմանադրական հեղափոխություն անել: «Մեր նպատակն արդար ընտրությունների միջոցով իշխանություն ձևավորելն է: Այսուհետ ոչ ոք չի հանդգնի ժողովրդից խլել իշխանությունը, մեզ արդեն ոչ ոք չի կարող խաբել»,-ասաց նա:

Րաֆֆի Հովհաննիսյանն անդրադարձավ նաև Շանթ Հարությունյանին: «Շանթ Հարութունյանը, հավանաբար, վերջին քաղբանտարկյալը չի լինելու, պահանջում ենք նրա անհապաղ ազատ արձակումը»,- ասաց նա:

Ի դեպ, նա նաև տեղեկացրեց, որ մոտ ժամանակներս ասուլիս կհրավիրի և կպատասխանի լրագրողների հարցերին:

«Սաղ գիտենք, թազա բան ասա»,- ասաց հանդիպմանը ներկա` Հովհաննիսյանին սատարող մի ծերունի և, դժգոհելով Հովհաննիսյանի ելույթից, սկսեց թերթ կարդալ:

Այս պահին Հովհաննիսյանը շարունակում է իր ելույթը: