Օպերայի եւ բալետի թատրոնի աշխատակիցները հանդիպել են նախարարին

Ալ. Սպենդիարյանի օպերայի եւ բալետի ազգային ակադեմիական թատրոնի աշխատակիցները հանդիպել են ՀՀ մշակույթի նախարար Հասմիկ Պողոսյանի հետ: Այս մասին yerkir.am-ի հետ զրույցում նշեց թատրոնի փոխտնօրեն Սուրեն Աղաբաբյանը:

Նա տեղեկացրեց նաեւ, որ հանդիպման ժամանակ քննարկվել են բոլոր հարցերը, հնչել են տեսակետներ ե՛ւ նախարարի, ե՛ւ աշխատակիցների կողմից:

«Կոլեկտիվն ըմբռնել է նախարարի կողմից բարձրացված հարցերը, նախարարը` կոլեկտիվի: Մեր Կառավարման խորհուրդն այդ ամենն ընդունել է ի գիտություն, խնդրել որոշակի ժամանակ, որպեսզի քննարկվի, քանի որ 5-10 րոպեում նման հարցերը չեն լուծվում: Բարձրացված խնդրին պահի, րոպեի լուծում տալ չենք կարող»,- ասաց Աղաբաբյանը:

Նրա հավաստմամբ` թատրոնում լրիվ հանգիստ վիճակ է. «Մեզ մոտ խաղաղ վիճակ է, դասերն ընթանում են, փորձերը` նույնպես: Ոչ մի անհանգիստ վիճակ չունենք եւ, կարելի է ասել, չենք էլ ունեցել»: