Գեղասահորդի մայրը տունը գրավ է դրել, որպեսզի տղան մասնակցի օլիմպիական խաղերին

17-ամյա ֆիլիպինցի  գեղասահորդ Մայքլ Քրիստիան Մարտինեսի մայրը դիմել է ծայրահեղ քայլերի, որպեսզի տղան կարողանա մասնակցել Սոչիի օլիմպիական խաղերին. նա գրավի է դրել իրենց սեփական տունը, որպեսզի կարողանա ֆինանսավորել տղային:

Տունը գրավ դնելուց առաջ գեղասահորդի մայրը՝ Մարիա Թերեզա Մարտինեսը, դիմել է երկրի նախագահ Ֆիլիպին Բենիգնո Ակինո III-ին, որպեսզի նա ֆինասնավորի տղային, սակայն մերժում է ստացել:

«Որոշեցի տունս գրավ դնել, որպեսզի տղաս կարողանա մասնակցել խաղերին: Սա խելահեղության է հասցնում: Անգամ վստահ չեմ, որ նախագահի աշխատակազմից որևէ մեկը տեղյակ է, որ օլիմպիական խաղերում իրենց երկիրը ներկայացված է»,- գեղասահորդի մոր խոսքերը մեջբերում է Rappler.com-ը:

Իսկ 17-ամյա գեղասահորդին մնում էր միայն հույսը դնել իր հավատի և ընտանիքի վրա:

«Մինչև այսօր ես չեմ ունեցել ոչ մեկ, որպեսզի կարողանամ հույսս նրա վրա դնել: Միայն մայրս է: Իմ միակ հույսն Աստվածն է: Նրանից ես օգնություն եմ միշտ խնդրում: Եվ նա ինձ իսկապես օգնում է»,- ասել է Մարտինեսը:

Մայքլ Մարտինեսը պայքարի մեջ կմտնի փետրվարի 13-ին: Կներկայանա կարճ ծրագրում: